萬眾期待PSP遊戲Gundam VS Gundam終於都出咗, 玩過之後總覺得同以前嘅Gundam系列冇咩太大分別, 唯一最感興趣就係佢個2on2, 即係可以連線二打二. 平時用高達就玩得多, 唔知操控雷射大砲又係咩感覺呢? 真係要快啲搵齊四個人一齊開戰先! 加上今集高達嘅數量應該係最多最齊全嘅一集, 由原祖RX-78到最新嘅Exia都有, 唔知仲有冇其他隱藏機體呢?

      唔知道一提起順德、佛山等地方大家會聯想到啲咩呢? 係碧桂園? 黃飛鴻定抑或係乜都諗唔到呢? 今次到順德主要係純粹飲飲食食+輕輕鬆鬆, 一嚐當地美食之餘又可以放鬆一下心情, 如果唔係睇怕我又要買多幾本心靈雞湯嚟補補佢啦!

      今次個旅行團(名為美食之旅[達美旅遊])最唔同嘅地方係唔會帶我哋去聽講座、強迫要買手信等, 反而著重咗喺玩同食兩方面, 所以覺得算係唔錯. 經過兩個多鐘嘅車程, 終於到達目的地, 食過午飯後隨即去到"長鹿休閒度假農莊", 唔好以為係佢係一個只有豬牛羊等動物睇嘅地方, 仲包含咗機動遊戲, 不過我覺得嗰啲機動遊戲缺乏保養, 所以比較殘舊. 當中更見到好多幼稚園、小學生到嚟玩, 相信係學校旅行之類.

                                  (農莊內嘅景色都算過得去)

      早幾日同幾個朋友到迪士尼玩(當然係指香港嗰個啦!), 皆因有朋友間公司攪function, 所以可以用特惠價去玩, 我哋準時下晝到達, 之後經過一輪「嚴密」檢查後, 終於順利進入園內. 第一時間唔係親吻迪士尼土地, 而係去攞樂園指南, 其實由邊度玩起都冇乜所謂, 只係沿住美國小鎮大街一路行, 最後決定首先去"明日世界"玩飛越太空山. 利用入場証攞咗張Fast Pass先, 唔使排大隊之餘又可以去其他地方玩住先, 真係相當唔錯嘅設計. 突然發覺見到有好多人排隊, 原來係巴斯光年出咗嚟同大家影相, 我哋當然唔執輸啦! 最後都可以同佢影到合照同全家福. 我覺得佢啲動作相當攪笑, 十足十同睇電影冇分別.

      過咗一個非常和暖嘅十月之後, 呢兩日終於能夠感受到一啲秋意! 話晒都過咗中秋節好耐, 都好應該要涼返一下甚至係凍, 如果唔係嘅話, 香港再唔會有春夏秋冬四季之分, 再加上平日買落啲靚衫就冇得著出嚟show畀大家睇.

      另外我有少少疑問, 唔知而家中小學仲會唔會有「秋季旅行」呢? 可能已經改咗名叫上學期旅行都未定. 同埋以後大家都唔再須要理會節氣, 因為已經唔多準.

      近日買咗電腦用嘅USB高清手指, 只係花費咗三百蚊左右, 終能一嚐喺屋企欣賞高清電視, 但只可惜自己部電腦張display card唔夠勁, 所以每當睇高清台時, 都會有窒下窒下嘅情況出現, 好彩其他台(J2、亞視新聞台等)係屬於標清廣播, 所以完全冇問題, 睇得不知幾開心. 

      至於用邊個software嚟睇, 其實都有好幾個, 不過由於本身送埋Total Media, 所以就用咗佢, 我覺得呢個software都幾好用, 不但錄影時可以錄埋雙語+字幕, 再睇返時都可以選擇, 又有Timeshift、EPG以及預校錄影等等功能. 可謂十分完美.

      早幾日重遊九龍城呢個昔日熱鬧嘅地方, 但而家總覺得冷清好多. 我哋今次算係專登走去呢個地方食泰國菜, 以前一講到食泰國菜, 好多人都一定會到九龍城, 而且更會二話不說話去黃珍珍, 不過知道而家嘅水準同口碑相比起以前都差咗, 所以決定邊行邊睇, 最後揀咗"泰農菜館"

      一入到去必然會見到佛像、泰王畫像泰式飾物等等. 我哋坐定定後立即點菜, 都係食嗰幾味: 菠蘿炒飯、明爐蒸魚、肉類串燒、咖哩炒蟹同甜品等. 最後埋單每人平均消費都只不過係一百蚊左右, 可以講話相當抵食. 值得一提嘅係其實除咗我哋本地人外, 喺餐廳內仲有好多遊客專程嚟食, 可想而知到九龍城食泰國菜, 已經係有著無可取代嘅地位.

      第二日行程大致上都係去威尼斯人、周圍邊玩邊食, 再到官也街買手信等(離威尼斯人唔遠), 喺去買手信之前先到"住宅博物館", 呢度有幾間充滿葡萄牙式嘅屋畀遊客參觀.

      總括今次澳門之行, 可以講係「有益身心」, 若然唔計去賭場嘅話, 今次只係去澳門遊覽各名勝景點等, 有時候覺得咁樣遊澳門都幾好玩吖!

PS. 好彩我哋朝早check out完後, 再到酒店大堂寄存行李, 如果唔係攞住行李去玩嘅話都幾辛苦!

                                       (充滿葡萄牙式風格嘅屋)

      其餘照片:

      參觀完松山燈塔同動物園後, 跟住落嚟就決定去食雪糕. 一提到雪糕可能有好多人都知道我講乜, 就係以賣雪糕出晒名嘅禮記, 尤其係三文治雪糕以及紅豆雪條最為出名. 不過我哋成班人都覺得平平無奇, 更反問返點解會咁出名呢? 唔通住喺澳門嘅人真係未食過其他好嘢? 真係只有佢哋至知.

      完成酒店check in後, 開始向其他「景點」進發, 嚟到澳門當然唔少得要去拜訪何生啦! 今次同以往唔同嘅係一入到門口, 你會見到兩支祥雲火炬畀大家影相. 呢兩支當然係真嘢, 曾經參加過奧運火炬傳送. 但當我影完之後就立即見到有工作人員推走晒佢哋, 所以之後嚟嘅人只係見到何生個頭像.

                                              (祥雲火炬展覽)

      醫完肚仔後, 繼續我哋嘅健康行程, 下一站係"松山燈塔". 起初以為只係坐一坐纜車, 望下望燈塔, 原來除咗呢兩樣之外, 估唔到仲會有防空洞、教堂壁畫同埋動物園睇添! 如果想乘坐松山纜車上山, 就一定要到"二龍喉公園".

        (松山纜車外觀)

      一提到澳門相信好多人只會記得賭場同夜生活等等, 其實澳門仲有好多景點好值得我哋去遊覽, 今次就有另一番經歷. 除咗遊覽景點外, 今次行程嘅主要目的都係為咗去睇澳門煙花比賽.

      話咗係健康遊, 當然唔會只係去賭場(其實賭場係唔屬於健康景點)等地方啦! 一到步我哋一行人就乘坐巴士到位於紅街市隔離嗰間"龍華茶樓". 如果你係攝影發燒友, 又抑或係鍾意懷舊一番嘅, 都好應該嚟一嚟. 因為當我一上到去時, 就已經覺得自己返咗去六七十年代嘅茶樓飲茶, 無論係裡面嘅擺設定係環境, 都同以前舊式茶樓冇乜分別, 唯一美中不足嘅係如果有埋幾籠雀掛喺度就真係好perfect. 咁嘅茶樓相信喺香港已經係絕跡咗好耐.

                                          (龍華茶樓外觀)

                       (裡面充滿舊式茶樓味道)